गौमुखी गाउँपालिकाका–३ टोरेटा निवासी सुजाता सुनारका बुबा बुबा पुर्ण बहादुर सुनार र आमा सबिता सुनारलाई भेट्न पुगेका गाउँपालिका उपाध्यक्ष महाविर रानामगर सहित ।
                                                                                                  तस्वीरः शशिधर भण्डारी

प्युठान, २८ वैशाख (जनखोजी)ः गौमुखी गाउँपालिकाका उपाध्यक्ष महाविर रानामगरले पढाईको खर्च ब्यहोरेपछि गौमुखी गाउँपालिकाका–३ टोरेटा की सुजाता सुनारको पढाइमा सहजता भएको छ । विकासको कामको अनुगमनका क्रममा टोरेटा पुगेका उपाध्यक्ष रानामगरले परिवारको समस्या देखिपछि आफ्नो कार्यकाल अवधिमा सुजाता सुनारलाई लाग्ने पढाई खर्चको जिम्मेवारी लिनु भएको हो । सो प्रतिवद्धताले सुनार परिवार खुसी भएका छन् ।
गौमुखी गाउँपालिका–३ टोरेटा निवासी ७ वर्षीय सुजाताका बुबा पुर्ण बहादुर सुनार र आमा सबिता सुनार दुबैजना अपाङ्ग(फरक क्षमता भएको) हुनुहुन्छ । परिवारको आर्थिक स्रोत नभएपछि परिवार आर्थिक सङ्कटमा छ ।
परिवारमा आर्थिक अभावका कारण आफन्तकोमा बसी जनता माद्यामिक विद्यालय बाग्दुलामा कक्षा ३ मा अध्ययनरत हुनुहुन्छ । आर्थिक अभावले आफन्तकोमा पठाइएको उहाँका बुबा पुर्ण बहादुर सुनारले बताउनु भयो ।
सुजाता सुनारको उज्ज्वल भविष्यको कामना सहित पढाई खर्च अन्तरगत ड्रेस, कापीकलम, झोला, स्कुलले लिने सम्पूर्ण शुल्कहरु आफुले ब्यहोर्ने उपाध्यक्ष महाविर रानामगरले जानकारी दिनु भयो । “परिवारको नाजुक अवस्थाका कारण मेरो कार्यकालभर सुजाताको पढाई खर्च ब्यहोर्नेछु ।”–उपाध्यक्ष रानामगरले भन्नु भयो । आफ्नो सहयोगले आर्थिक रुपमा समस्यामा रहेकी सुजताको पढाइमा सहजता हुने विश्वास लिएको उपाध्यक्ष रानामगरको भनाइ छ ।