जनखोजी संवाददाता
प्युठान, नेकपा सहित ६ राजनीतिक दलले आव्हान गरेको नेपाल बन्दमा नेकपा सहित जिल्लाका कम्युनिस्ट पार्टीहरु मिलेर सडक संवाद गरेका छन् । नेकपा(माओवादी केन्द्र), नेकपा (एमाले), नेकपा(मसाल) का नेताहरु सहित ६ दलले सडक संवाद कार्यक्रम गरेका हुन् ।
नेपाल कम्युनिस्ट पार्टीको सहायक संगठन युवा संगठन नेपाल प्यूठानको आयोजनामा गरिएको सडक सम्वाद कार्यक्रममा नेपाल कम्युनिस्ट पार्टी, नेकपा माओवादी केन्द्र, नेकपा एमाले र राष्ट्रिय जनमोर्चाका युवाहरुले एमसीसी सम्झौता राष्ट्रघाती रहेको बताएका छन् ।
नेपाल बन्दलाई सिर्जनात्मक रुपमा सफल पार्नको लागि मात्र नभई एमसीसी सम्झौता कति ठिक कति बेठिक जिल्ला तहमा व्यापक बहसको विषय बनाउने उद्देश्यले सडक सम्वाद कार्यक्रमको आयोजना गरिएको युवा संगठन नेपाल लुम्बिनी प्रदेशका संयोजक हरि बस्नेतले बताए ।
नेकपा (माओवादी केन्द्र) लुम्बिनी प्रदेश सदस्य कृष्ण घिमिरे र माओवादी केन्द्रका प्युठान नगरकमिटि सचिव सुमनराज श्रेष्ठले राष्ट्रिय स्वाधीनताका लागि एमसीसी सम्झौता घातक भएकोले त्यसको बिरुद्धमा आफुहरु ज्यानको बाजी थापेर लड्न तयार रहेको बताए ।
सम्वाद कार्यक्रममा नेकपा प्यूठानका पूर्व जिल्ला इन्चार्ज रत्न थापाले एमसीसी सम्झौता राष्ट्रघाती रहेको र अमेरिकी सम्राज्यवादको नेपाललाई युद्धभुमि बनाउने रणनीति भएको बताए । यसर्थ राष्ट्रघाती एमसीसी सम्झौतालाई जनस्तरबाटै खारेज गर्न आम नागरिकलाई उनले आग्रह गरे ।
कार्यक्रममा नेकपा एमाले र राष्ट्रिय जनमोर्चाका नेताहरुले एमसीसी सम्झौता राष्ट्र हित विपरित रहेकोले हुबहु पास गर्न नहुने बताएका छन् ।
युवा संगठन नेपाल लुम्बिनी प्रदेश संयोजक हरि बस्नेतले पुर्खाले आर्जेको देश अमुक दल वा कुनै मन्त्रीको सनकमा संसदमा पास भइ हाल्ने र अमेरिकालाई आफ्नो गोजीको सम्पत्ति जस्तै सजिलै दिइ हाल्ने अधिकार नभएको बताए ।
प्रधानमन्त्रीलाई सहयोग
एमसिसि अनुदानको विरोध स्वरुप युवा संगठन नेपालले सहयोग संकलन गरी प्रधानमन्त्री देउवालाई पठाउने भएको छ । विरोध कार्यक्रमकै क्रममा स्वेच्छिक सहयोग मागी प्रमुख जिल्ला अधिकारी मार्फत प्रधानमन्त्रीलाई सो रकम पठाउने जनाएको छ ।