जनखोजी संवाददाता
प्युठान, नेपाल कम्युनिस्ट पार्टी मसालका महामन्त्री मोहन विक्रम सिंहले नेकपा एमालेले प्रतिगमनको नेतृत्व गरिरहेको आरोप लगाएका छन् । आइतबार प्युठानको बाग्दुलामा भएको पत्रकार भेटघाटका क्रममा सिंहले एमालेले प्रतिगमनको नेतृत्व र अन्य कम्युनिस्टहरुले अवसरवादी बनेर कम्युनिस्ट पार्टीको वदनामी गरेको बताएका हुन् ।
प्रगतिशल पत्रकार संघ, नेपाल प्युठानको आयोजनामा आयोजित कार्यक्रम बोल्दै सिंहले वर्तमान राष्ट्रिय राजनीतिमा के.पी.ओलीको प्रतिगमनबाट मुलुकलाई जोगाउन ५ दलिए गठबन्धन भएको र अहिले पनि त्यसका बिरुद्ध बलियो मोर्चा आवश्यक भएको जिकिर गरे ।“एमालेको साठगाठ राजावादीहरुसंग छ” सिंहले भने,“गणतन्त्र, धर्मनिरपेक्षता र संविधानको रक्षार्थ ५ दलीय मोर्चा आवश्यक छ ।” यस पटक पनि एमाले सफल भए देश प्रतिगमनमा पुनः फस्ने हुँदा जनताले गठबन्धनलाई स्वीकार गरेको उनको दावी छ ।
एमालेसंग गठबन्धन हुँदैन, बरु एक्लै लड्छौ
सिंहले गठबन्धनमा अपमानित भएपनि आफ्नो पार्टीको मोर्चाको रुपमा रहेको जनमोर्चा आगामी मंसिर–४ को संघ र प्रदेशको चुनावमा एक्लै लड्ने तयारी भएको जानकारी दिए । सिंहले थपे “एक्लै चुनावमा जान्छौँ तर एमालेसँग साँठगाठ गर्दैनौँ ।”उनले नयाँ पार्टी निर्माण गरेकाहरुलाई अवसरवादी, भ्रष्ट्र र अधिनायकवादी सोच भएका व्यक्तिहरु सही नीति र बिचारमा अट्न नसक्ने टिप्पणी गरे ।
राजमोको प्युठान र बाग्लुङमा दावी
५ दलीय गठबन्धन हुँदा राजमोको संघका लागि प्युठान र बाग्लुङमा दावी हुने सिंहको भनाइ छ । साम्यबादी व्यवस्था नेकपा मसालको मुख्य एजेण्डा भएपनि अहिलेको बहुदलीय र संसदीय व्यवस्थाका प्राप्त उपलब्धि आत्मसात गर्दै आफ्नो चुनावी मोर्चा (राजमो) गलत प्रबृत्तिको बिषयमा फरक मत राख्दै जनता बिच गईरहेको समेत बताएका छन् ।
