जनखोजी संवाददाता
प्युठान, नेपालको संविधान २०७२ को मर्म बुझे मुलुकको विकासले मुहार फेरिने संविधान सभा सदस्य नारायण अधिकारीले बताए । सातौं संविधान दिवस तथा राष्ट्रिय दिवस २०७९ को अवसरमा माण्डवी गाउँपालिकाले आयोजना गरेको कार्यक्रममा बोल्दै जनताका थुप्रै समस्याहरुलाई संविधानले सम्बोधन गरेको भन्दै मर्म अनुसार कार्यान्वयन गर्न सके समृद्ध नेपालको सपना साकार हुने दावी गरे ।
अधिकारीले धर्मनिरपेक्षता, संघीयता, समावेशी, समानुपातिक प्रणाली लगायतका विषयहरुले शोषित, पीडित, वषौंदेखि विभेद भोगिरहेका नेपालीहरुलाई सम्बोधन गरेको बताए । सबैको सम्बोधनका कारण यस्को कार्यान्वयनका पक्षमा जोडवल गर्नु पर्नेमा अधिकारीको जोड थियो ।

स्थानीय तह संविधानको अधिकार बमोजिम जनताको पक्षमा काम गर्ने प्रयास भइरहेको माण्डवी गाउँपालिकाका अध्यक्ष नमराज अधिकारीले बताए । उपाध्यक्ष पूर्ण प्रसाद कालाथोकीले पनि संविधानको कार्यान्वयनका पक्षमा धारणाहरु राखेका थिए ।
माण्डवीको सभाहल देविस्थानमा भएको कार्यक्रममा गाउँपालिका संविधानको महत्व तथा संविधानमा भएका केही बुँदाहरु बारे पालिकाका प्रमुख प्रशासकीय अधिकृत प्रकाश पाण्डेले प्रस्तुतीकरण, बलराम पौडेलले स्वागत मन्तब्य र नारायण जि.सी.ले सञ्चालन गरेका थिए ।
सहिद परिवारको सम्मान
संविधान दिवसको अवसरमा माण्डवी भित्रका सहिद परिवारलाई प्रमाण पत्र र दोसल्ला ओडाएर सम्मान गरिएको छ । माण्डवी गाउँपालिकाबाट जनयुद्धको समयमा तत्कालिन साही सेना र माओवादीको तर्फबाट गरी २२ जनाले सहादत प्राप्त गरेका थिए । उनीहरुको परिवारलाई सम्मान गरिएको हो ।