प्युठान, नेकपा(माओवादी केन्द्र) का केन्द्रीय सचिव लिलामणी पोख्रेल र नेपाली काँग्रेसका केन्द्रीय सदस्य प्रध्यापक डाक्टर गोविन्दराज पोख्रेलले गठबन्धनलाई बहुमतका साथ विजयी गराउन कार्यकर्तालाई निर्देशन दिएका छन् । सोमबार प्युठान प्रदेश सभा क्षेत्र नं. १ का अगुवा कार्यकर्ता भेला तथा राजनितिक प्रशिक्षण कार्यक्रममा बोल्दै पोख्रेलद्धयले आसन्न निर्वाचनमा गठबन्धनका साझा उम्मेद्वारहरुलाई फराकिलो मतान्तर सहित विजय गराउन निर्देशन दिएका हुन् ।
नेकपा माओवादी केन्द्रका नेता लिलामणी पोख्रेलले लामो संघर्षबाट प्राप्त उपलव्धिहरुको रक्षाका लागि गणतान्त्रिक, संविधानलाई मान्ने दलहरुलाई विजय गराउनु पर्ने बताए । उनले देशमा संविधानको रक्षा, व्यवस्थाको रक्षा गर्दै जनताको अवस्था परिवर्तन गराउन गठबन्धन लागि परेको भन्दै प्राप्त उपलब्धी उल्ट्याउने प्रयासरत दलहरुलाई परास्त गर्नुको विकल्प नभएको जिकिर गरे ।
नेपाली काँग्रेसका केन्द्रीय सदस्य तथा योजना आयोगका पूर्व उपाध्यक्ष प्रा.डा. गोविन्द राज पोख्रेलले पार्टी भित्रका मत मतान्तरलाई ताथि राखेर व्यवस्था वचाउनका लागि गठबन्धनलाई विजय गराउनु पर्ने आवश्यकता रहेको प्रष्ट्याए । “मेरो पार्टी भित्र धेरै मत मतान्तर छन्”, पोख्रेलले भने “तर व्यवस्था वचाउनुको विकल्प नभएपछि गठबन्धनलाई भोट माग्न आएको छु । ”
प्रा.डा. गोविन्द राज पोख्रेलले केही समय अघि एक अन्तवार्तामा प्युठानमा गठबन्धनलाई भोट नमाग्ने धारणा राखेका कारण अनेकन विश्लेषण भएका थिए । यसै हप्ता बुटवलमा र सोमबार प्युठानमा गठबन्धनको सभामा सहभागी भई मत मागेपछि गठबन्धनलाई थप ऊर्जा मिलेको गठबन्धनका नेताहरु बताउछन् ।
त्यसैगरी नेकपा(एकीकृत समाजवादी)का केन्द्रीय सदस्य राजकुमार कक्षपति, प्रदेश सभा निर्वाचन क्षेत्र नं. १ का उम्मेद्वार तथा माओवादी केन्द्रका प्रदेश सचिव कृष्ण अधिकारी प्रकाश, राष्ट्रिय जनमोर्चाका नेता तथा निवर्तमान जिल्ला समन्वय समिति प्रमुख केशवराज आचार्य, नेपाली काँग्रेस प्युठानका सभापति विष्णुकुमार गिरीले गठबन्धनको पक्षमा निर्वाचन माहोल वनिसकेको दावी गर्दै गठबन्धन दलको पक्षमा मतदान गर्ने वातावरण मिलाउन आफ्ना कार्यकर्तालाई निर्देशन दिएका थिए ।