शशिधर भण्डारी
प्युठान, प्युठान नगरपालिकामा स्थानीय तह निर्वाचनको दोश्रो कार्यकालको पहिलो वर्षमा सहाराविहिनता र रोजगारहिनताको अवस्था हटाउने योजना अघि बढेको छ । प्युठान नगरपालिकाको हिउँदे अधिवेशनबाट दुई दिर्घकालिन तथा महत्वपूर्ण योजना अघि सारेको हो ।
अभिभावक बिहिन बालबालिकालाई आवाशिय सुविधासहितको शिक्षा दिन थालेको प्युठान नगरपालिकाका नगरप्रमुख विष्णु योगीले जानकारी दिए । शैक्षिक शत्र सकिन लागेकाले शुरुवाती चरणमा रु १० लाख वजेटको विनियोजन गरिएको हो । नगरपालिका क्षेत्रमा अभिभावक बिहिन भएका बालबालिकाको वडा तथा विद्यालय मार्फत तथ्यांक संकलन गरी नयाँ शैक्षिक सत्रबाट कार्यक्रम लागु गर्नेछ ।
त्यसैगरी नगरपालिकाले युवाहरुलाई न्युनदरमा व्यवसायिक ऋण दिने भएको छ । युवा स्वरोजगार कोष कार्यक्रम नामाकरण गरिएको सो योजनामा रु १ करोड वजेटको व्यवस्था गरिएको हो । नगर प्रमुख योगीका अनुसार कार्यविधि निर्माण गरी विना धितो ऋणको व्यवस्था गरिने भएको हो ।