सिसहनियाँ, नेकपा (माओवादी केन्द्र) राप्ती गाउँपालिकाको आयोजनामा मंगलबार लालमटियामा बैचारिक–राजनीतिक प्रशिक्षण कार्यक्रम सम्पन्न भएको छ ।
पार्टीको दुई महिने संगठन सुदृढीकरण अभियान अन्तर्गत दाङ जिल्लामा प्रशिक्षण तथा संगठन सुदृढीकरण शुरू गरिएको हो ।
सो प्रशिक्षण कार्यक्रमलाई पार्टी स्थायी कमिटी सदस्य कुल प्रसाद केसी (सोनाम) केन्द्रीय सदस्य एवम् दाङ जिल्ला इञ्चार्ज निर्मल आचार्य, केन्द्रीय सदस्य इन्द्रजित थारू, केन्द्रीय अनुशासन आयोगका सदस्य लुमबहादुर कार्की, लुम्बिनी प्रदेश कमिटी सदस्य कृष्ण अधिकारी, राप्ती गाउँपालिका इन्चार्ज चित्र बहादुर थापा मगर लगायतका नेताहरूले प्रशिक्षण मन्तव्य राखेका थिए ।
प्रमुख अतिथि सोनामले पार्टी कमिटि आधार ईलाका सहितको कमिटिमा परिणत गरी सेल देखी केन्द्र जोड्नु पर्ने बताए । उनले सेलसम्म पुगेर पूर्व माओवादीहरुलाई घर फर्को अभियान अन्र्तगत सफल पार्न निर्देशन दिए ।
कार्यक्रममा पार्टीका विभिन्न तहका नेताकार्यकर्ता तथा जनवर्गीय संगठनका अध्यक्षहरुले आ–आफ्नो क्षेत्रका बारेमा रिपोर्टिङ गरेका थिए। माओवादीले केन्द्रीय परिपत्र अनुरूप जिल्लाका १० वटै पालिकामा संगठन सुदृढीकरणका लागि प्रशिक्षण, भेला लगायतका कार्यक्रम तय गरेको छ ।
यो अभियानले पार्टीलाई जनस्तरमा थप मजबुत बनाउने जिल्ला इञ्चार्ज आचार्यले बताए । “हामीले प्रशिक्षणका साथै जनताका दैनिक जीवनमा आइपर्ने समस्या समाधानका लागि उचित पहल गर्ने छौं,” उनले भने, “हाम्रो नेतृत्व रहेको अहिलेको सरकारबाट जनजिविकाको सवालमा केके काम गर्न सकिन्छ भनेर जनतासँग अन्तर्क्रिया गर्छौं ।”
कार्यक्रम राप्ती गाउँपालिका पार्टीका कार्यवाहक अध्यक्ष नारायण प्रसाद शर्माको अध्यक्षता तथा सह सचिव बसन्त नेपालीको स्वागत मन्तव्य र सचिव तुला गिरीको सञ्चालन गरेका थिए ।