प्युठान, ७ चैत(जनखोजी)ः कपिलवस्तुबाट हराएका एक पुरुष प्युठानमा मृत फेला परेका छन् । फागुन २७ गते देखि हराएका कपिलबस्तुको शिवराज नगरपालिका–१ दोबाटोका ५१ वर्षीय बुद्ध सिंह घर्तीमगर मंगलवार मृत फेला परेको जिल्ला प्रहरी कार्यालय प्युठानका प्रहरी प्रवक्ता प्रहरी निरीक्षक हुमानन्द खनालले जानकारी दिनुभयो ।
प्रहरी निरिक्षक खनालका अनुसार मगरको शव सरुमारानी गाउँपालिका–४, मोतिपुर प्युठानमा सडकदेखी ३ सय मिटर तल मृत अबस्थामा फेला परेको हो । घर्तिमगर फागुन २७ मा घरबाट आमाको बृद्धभत्ता बुझ्न पुख्र्यौली गाउँ प्युठानको नौबहिनी गाउँपालिका–२ लिघा हिड्नु भएको थियो । घरबाट हिडेर सम्पर्क बिहिन भएपछि परिवारले प्रहरी र स्थानीयलाई खोजीका लागि आग्रह गरेका थिए ।
शवलाई पोष्टमार्टमका लागि प्युठान अस्पताल विजुवारमा ल्याईएको छ । घटनाका बारेमा थप अनुसन्धान जारी रहेको जिल्ला प्रहरी कार्यालय प्युठानले जनाएको छ ।
…………………
