आदरणीय पाठकवृन्द,
नेपालको संविधानले संघीय लोकतान्त्रिक गणतन्त्रात्मक शासन प्रणालीको माध्यमबाट सुशासन, विकास र समृद्धि हासिल गरी स्वाधीन, सम्मुनत तथा समाजवाद उन्मुख अर्थतन्त्र विकास गर्ने परिकल्पना गरेको छ । संविधानले व्यवस्था गरेको मौलिक हक, राज्यको निर्देशक सिद्धान्त र नीति, दिगो विकास लक्ष्य प्राप्तिका लागि सुशासनयुक्त समाज निर्माणको अहम् भूमिका मिडियाको हुने गर्दछ ।
सुशासनयुक्त समाज निर्माण गरी समृद्ध नेपालको परिकल्पनालाई साकार बनाउँदै नेपाललाई विकशित गराउन जनस्तरका समस्या, अवसर र चुनौतिका विषयवस्तुको उठान र समाधानका उपायको खोजी गर्नु जरुरी छ । यही सन्दर्भमा जनजनको समाचारलाई प्राथमिकता दिदै सम्मुनत समाजको निर्माणका लागि हामी यहाँहरुका सामु आएका छौँँ । हाम्रो यात्राको पहिलो पाइलाको रुपमा जनखोजी साप्ताहिक पहिलो अङ्क सुरु गरेका छौँ ।
राष्ट्रियता, लोकतन्त्र, सुशासन, समृद्धि र सभ्य समाज निर्माणको महान् उद्देश्यप्रति हामी पूर्ण समर्पित रहनेछौ । पूर्वाग्रहरहित ढङगले सत्यतथ्य समाचार निरन्तर प्रवाह गर्ने प्रतिवद्धता गर्दछौ ।
पाठकवृन्द, २०७७ फागुन देखि तीव्र रूपमा फैलिएको कोरोना भाइरस(कोभिड(१९) नियन्त्रणका लागि गरिएको बन्दाबन्दीका कारण अनेकन समस्याहरु हाम्रा वीचमा आए । असहज परिस्थितिका कारण कतिपय पत्रिकाहरू त बन्द नै भए । छिटो, छरितो र सहज रूपमा सूचना सम्प्रेषण गर्नसक्ने प्रविधिका कारण अनलाइन समाचार पोर्टलहरूको महत्व र आवश्यकता यस बीचमा बढ्यो । सोही कुरालाई मध्यनजर गर्दै श्रव्यदृश्य, मुद्रण, डिजिटल पत्रिकाको रूपमा तपाई माझ पस्कने गरी लिएर आएका छौँ ।
पढ्न, सुन्न र देख्न सकिने पत्रकारिता नै अहिलेको आवश्यकता हो । त्यही जनताको चाहनाको परिपूर्ती गर्न यस मिडियाले हदसम्मको प्रयत्न गर्ने छ ।
विधिको शासन, मानवअधिकार, भ्रष्टाचारमुक्त शासकीय पद्धतिका निम्ति हाम्रो प्रयास निरन्तर रहनेछ । स्वच्छ र सभ्य समाज स्थापनाको आधारशिला तयार गर्न, सरकारी निकायभित्रका बेथिति–विसंगति उजागर गरी त्यस्ता निकायलाई जबाफदेही बनाउनु हाम्रो दायित्व हो । यस सुरुवाती घडीमा आमपाठक, विज्ञापनदाता, विक्रेता, समाचारदाता, लेखकका माध्यमबाट सहकार्यका लागि हार्दिक अपिल गर्दै निरन्तर रूपमा तपाईंहरूको साथ, ऊर्जा र हौसलाको अपेक्षा गरेका छौँ ।